ចៅអធិការវត្តដែលដេកជាមួយស្រីរួចសឹកខ្លួនឯងឥឡូវ ធម្មការខេត្តឲ្យបួសនៅវត្តដដែល
lookandcomment
|
Monday, March 15, 2010
|
សៀមរាប: អតីតចៅអធិការវត្តពោធិក្រឡាញ់ ស្ថិតក្នុងភូមិក្រឡាញ់ ឃុំក្រឡាញ់ ស្រុកក្រឡាញ់ រៀបចំខ្លួនមកបួសក្នុងវត្តដើមនេះវិញ ត្រូវបានប្រជាពលរដ្ឋ ព្រះសង្ឃ អាចារ្យ គណៈកម្មការវត្ត និងអាជ្ញាធរដែនដីបានផ្ទុះការតវ៉ាជាបន្តបន្ទាប់ ដោយមិនអនុញ្ញាតឲ្យអតីតចៅអធិការវត្តរូបនេះ មកបួសនៅក្នុងវត្តដើមនេះឡើយ ។ កាលពីថ្ងៃអាទិត្យ ទី១៤ ខែមីនា ឆ្នាំ២០១០ មានព្រះសង្ឃ អាចារ្យ គណៈកម្មការវត្ត មានមេភូមិ និងមេឃុំ ក្រឡាញ់ផងនោះប្រមាណ ២០ នាក់ បានជួបប្រជុំគ្នានៅក្នុងវត្តពោធិក្រឡាញ់ ដើម្បីរកវិធានការទប់ស្កាត់មិនឲ្យអតីតចៅអធិការវត្តមួយរូបឈ្មោះ ស៊ិន ឃីន ដែលគ្រោងមកបួសសារជាថ្មីនៅវត្តខាងលើ នាថ្ងៃច័ន្ទ ទី១៦ ខែមីនានេះ ។
គួរបញ្ជាក់ថា កាលវេលាម៉ោង២១ ថ្ងៃទី០៤ ខែកុម្ភៈ ឆ្នាំ២០១០ កន្លងទៅ ចៅអធិការវត្តពោធិក្រឡាញ់ ព្រះនាម ស៊ិន ឃីន ព្រះជន្ម៤១ព្រះវស្សា បានឲ្យបុរសម្នាក់ទៅឌុបស្ត្រីមេម៉ាយកូនមួយ អាយុ១៨ឆ្នាំ ឈ្មោះ រូន រ័ត្ន មានទីលំនៅភូមិទឹកជរ ឃុំទឹកជរ ស្រុកព្រះនេត្រ ខេត្តបន្ទាយមានជ័យ មកកាន់កុដិចៅអធិការ ។ ក្នុងយប់នោះ ចៅអធិការបានសុំនាងរួមរ័កនៅក្នុងកុដិ ក្រោយពីជួបគ្នាបានកន្លះម៉ោង ចៅអធិការរូបនោះបានឲ្យលុយនាងមេម៉ាយឈ្មោះ រូន រ័ត្ន ចំនួន៥ម៉ឺនរៀល ហើយក៏ឲ្យម៉ូតូឌុបត្រឡប់ទៅវិញទៅ ។ នេះគឺជាការរៀបរាប់របស់នាងមេម៉ាយ រូន រ័ត្ន ដែលនាងបាននិយាយឥតលាក់លៀម នៅក្នុងរបាយការណ៍នានា ហើយនាងបានឆ្លើយនៅមុខព្រះសង្ឃ អាចារ្យ គណៈកម្មាការ និងអាជ្ញាធរមូលដ្ឋាន កាលពីថ្ងៃអាទិត្យ កន្លងទៅ ។ នាង រូន រ័ត្ន បានឆ្លើយយ៉ាងដូច្នេះក៏ដោយសារតែភាគីខាងចៅអធិការ និងការិយាល័យធម្មការស្រុកក្រឡាញ់ បានកោះហៅនាងទៅបំភ្លឺ ហើយបង្ខំឲ្យនាងឆ្លើយបដិសេធថា ករណីដែលថាចៅអធិការរួមរ័កនោះ មិនមែនជារឿងពិតឡើយ ។ ដោយសាររឿងនោះបែកធ្លាយ ទើបថ្ងៃទី០៥ ខែកុម្ភៈ ឆ្នាំ២០១០ ព្រះសង្ឃ អាចារ្យ គណៈកម្មាការ និងអាជ្ញាធរមូលដ្ឋាន បានប្រជុំផ្ទៃក្នុងមួយនៅក្នុងវត្ត ដោយមិនឲ្យព័ត៌មានលេចឮចេញមកក្រៅ ខ្លាចក្រែងមានភាពស្អុយអាសោចិ៍កេរ្តិ៍ ដល់ចៅអធិការ និងវត្តទាំងមូល ។ ប៉ុន្តែនៅម៉ោង ១៧ ល្ងាច ថ្ងៃទី០៦ ខែកុម្ភៈ ឆ្នាំ២០១០ ព្រះចៅអធិការវត្តព្រះនាម ស៊ិន ឃីន មានការខ្មាសអៀន ហើយក៏សំរេចលាចាកសិក្ខាបទ(សឹក) ដោយខ្លួនព្រះអង្គផ្ទាល់ ហើយក៏និមន្តចេញពីវត្តទៅ ។ មុនពេលសឹកនោះដែរ ចៅអធិការវត្តអង្គនោះក៏បានទទួលកំហុសនៅចំពោះមុខអ្នកនៅក្នុងវត្ត ទាំងឡាយថា ព្រះអង្គខុសហើយបានលួចទៅដេកជាមួយស្រី ដែលខុសទៅនឹងច្បាប់របស់ព្រះពុទ្ធសាសនា ។
ក្រោយពីអតីតចៅអធិការវត្តពោធិក្រឡាញ់ បានលាចាកសិក្ខាបទ(សឹក) ព្រះមេគណខេត្តសៀមរាប ព្រះនាម ពេជ្រ សន បានធ្វើសង្ឃសំរេចចុះថ្ងៃទី១៧ ខែកុម្ភៈ ឆ្នាំ២០១០ និងមានការឯកភាពពីលោក វណ្ណ ប៊ុនណា ប្រធានមន្ទីរធម្មការ និងសាសនាខេត្តសៀមរាប ចុះថ្ងៃទី១៩ ខែកុម្ភៈ ឆ្នាំ២០១០ ហើយសំរេចតែងតាំងគណៈគ្រប់គ្រងសង្ឃបណ្តោះអាសន្ន នៅវត្តពោធិក្រឡាញ់ ឃុំក្រឡាញ់ ស្រុកក្រឡាញ់ដូចមានព្រះនាមខាងក្រោម ៖ ទី១. ព្រះវិនយ័ធរអនុគណ សួង ឈន ជាប្រធានទទួលរួម, ទី២. ព្រះសមុហ៍អនុគណ វឿ ធូ ជាអនុប្រធាន, ទី៣. ព្រះតេជគុណ ណំ ណាំង ជាជំនួយការទី១, ទី៤. ព្រះតេជគុណ យឹម សាមុត ជាជំនួយការទី២ ។ ប៉ុន្តែក្រោយពីមេគណខេត្ត និងមានការឯកភាពពីធម្មការខេត្តសៀមរាប សំរេចឲ្យតែងតាំងគណៈគ្រប់គ្រងវត្តបានមួយរយៈខ្លី គឺស្រាប់តែនៅថ្ងៃទី១១ ខែមីនា ឆ្នាំ២០១០ លោក វណ្ណ ប៊ុនណា ប្រធានមន្ទីរធម្មការ និងសាសនាខេត្តសៀមរាប បានចេញលិខិតអនុញ្ញាតមួយច្បាប់ឲ្យឈ្មោះ ស៊ិន ឃីន អាយុ៤១ឆ្នាំ ដែលជាអតីតចៅអធិការវត្តពោធិក្រឡាញ់ ចូលមកបួសជាភិក្ខុ នៅពុទ្ធសេមាវត្តពោធិក្រឡាញ់នេះវិញ ។ ការមកបួសជាសង្ឃវិញ ក្នុងលិខិតបានបញ្ជាក់ថា គឺ ស៊ិន ឃីន ក្រោយពីបួសនៅវត្តពោធិក្រឡាញ់ហើយ គឺចេញទៅគង់នៅវត្តនាគវ័ន សង្កាត់បឹងកក់២ ខណ្ឌទួលគោក រាជធានីភ្នំពេញ ។ ករណីដែលមានលិខិតខាងលើព្រះសង្ឃ អាចារ្យ គណៈកម្មការ និងអាជ្ញាធរមូលដ្ឋាន ព្រមទាំងប្រជាជន មានការងឿងឆ្ងល់យ៉ាងខ្លាំង ហើយពួកគាត់មិនអនុញ្ញាតឲ្យអតីតសង្ឃរូបនេះ មកបួសនៅក្នុងវត្តពោធិក្រឡាញ់នេះបានឡើយ ។ បើចង់បួសទៅបួសវត្តណាក៏បានក្រៅវត្តនេះ គំរោងការបួសជាថ្មី នឹងធ្វើឡើងនៅថ្ងៃទី១៦ ខែមីនា ឆ្នាំ២០១០ ខាងមុខ ។
អាចារ្យ គណៈកម្មការ ព្រះសង្ឃ ប្រជាជន និងអាជ្ញាធរមូលដ្ឋានបាននិយាយថា នឹងត្រៀមប្រឆាំង នៅថ្ងៃទី១៦ ខែមីនា ឆ្នាំ២០១០ មិនឲ្យអតីតសង្ឃអង្គនោះមកបួសក្នុងវត្តដើមវិញឡើយ ។ ពួកគាត់បញ្ជាក់ថា បើចង់បួសទៅបួសវត្តណាក៏បាន ក្រៅពីវត្តពោធិក្រឡាញ់ ។
លោក វណ្ណ ប៊ុនណា ប្រធានមន្ទីរធម្មការ និងសាសនាខេត្តសៀមរាប បាននិយាយប្រាប់អនកាសែតថា រឿងកំហុសឆ្គងទាំងឡាយ ដែលចោទប្រកាន់ចៅអធិការវត្តពោធិក្រឡាញ់នោះ ធម្មការខេត្តមិនបានដឹងឲ្យស៊ីជំរៅឡើយ ប៉ុន្តែមន្ត្រីសង្ឃខេត្តព្រះអង្គអ្នកស្រាវជ្រាវក្នុងរឿងនេះដែល បញ្ជាក់ថា អតីតចៅអធិការមិនបានដេកជាមួយស្រីឡើយ ។ ពាក់ព័ន្ធនឹងករណីដែលចេញលិខិតអនុញ្ញាតឲ្យកុលបុត្រឈ្មោះ ស៊ិន ឃីន ទៅបួសនៅវត្តពោធិក្រឡាញ់ ហើយគណៈកម្មការ អាចារ្យ ព្រះសង្ឃ ពុទ្ធបរិស័ទ និងប្រជាជនត្រៀមតវ៉ា មិនឲ្យមានការបួសជាថ្មីនោះ លោក វណ្ណ ប៊ុនណា បានឆ្លើយបញ្ជាក់ថា ករណីនេះលោកបារម្ភខ្លាំងដែរ ។ លោកបន្តថា បើនៅក្នុងវត្តមិនពេញចិត្តឲ្យមានការបួសអតីតចៅអធិការវត្ត គឺពួកគាត់អាចធ្វើលិខិតសុំមកមន្ទីរធម្មការខេត្តបាន ដើម្បីមន្ទីរធ្វើការពិចារណា ហើយអាចអនុញ្ញាតឲ្យទៅបួសនៅវត្តផ្សេងវិញ ។
ករណីនេះដែរ គណៈកម្មការ អាចារ្យ ព្រះសង្ឃ ពុទ្ធបរិស័ទ និងប្រជាជនបាននិយាយថា ពួកគាត់មិនធ្វើលិខិតទៅស្នើរសុំឡើយ បើថ្ងៃនោះអតីតចៅអធិការមកបួសក្នុងវត្តមែន វានឹងមានរឿងអ្វីមួយផ្ទុះឡើងមិនខាន ។ គេចាំមើលដែលថា ល្ងាចថ្ងៃទី១៦ ខែមីនា ឆ្នាំ២០១០នោះ អតីតចៅអធិការ និងអ្នកគាំទ្រហ៊ានចេញមកបួសនៅក្នុងវត្តដែរឬក៏អត់ ៕
Filed Under:
ដំណឹងថ្មីប្រចាំថ្ងៃ
,
បទល្មើស ឧក្រិដ្ឋ