សន្និសីទចក្ខុវិស័យប្រទេសកម្ពុជា លើកទី៤ ដើម្បីប្រមើមើលពីកំណើនសេដ្ឋកិច្ចកម្ពុជា ក្រោយវិបត្តិហិរញ្ញវត្ថុ
lookandcomment
|
Tuesday, March 16, 2010
|
ភ្នំពេញ: ក្រុមអ្នកជំនាញសេដ្ឋកិច្ច ជាថ្នាក់ដឹកនាំរដ្ឋាភិបាល វិស័យឯកជន អង្គការសង្គមស៊ីវិល និងសហគមន៍អភិវឌ្ឍន៍អន្តរជាតិ សរុបប្រហែល ៣០០ នាក់ នឹងចូលរួមក្នុងសន្និសីទចក្ខុវិស័យប្រទេសកម្ពុជា លើកទី៤ ដើម្បីពិចារណាលើសមិទ្ធិផល និងអនាគតរបស់កម្ពុជា ក្រោយពីវិបត្តិសេដ្ឋកិច្ច។ សន្និសីទ ដើម្បីគាំទ្រដល់កិច្ចប្រឹងប្រែងទប់ទល់នឹងវិបត្តិសេដ្ឋកិច្ច របស់រាជរដ្ឋាភិបាលកម្ពុជា វិស័យឯកជន និងអ្នកពាក់ព័ន្ធដល់ការអភិវឌ្ឍប្រទេសកម្ពុជាផ្សេងទៀត នឹងត្រូវធ្វើឡើង នៅថ្ងៃពុធ ទី១៧ ខែមីនា ឆ្នាំ២០១០ នៅសណ្ឋាគារ ភ្នំពេញ។
អង្គសន្និសីទ ដែលរៀបចំឡើង ដោយវិទ្យាស្ថានបណ្តុះបណ្តាល និងស្រាវជ្រាវ ដើម្បីអភិវឌ្ឍន៍កម្ពុជា ( CDRI ) និងធនាគារ ANZ Royal នឹងត្រូវផ្តោតសំខាន់លើកំណើនសេដ្ឋកិច្ចខ្ពស់ឡើងវិញ ព្រមទាំងទស្សនវិស័យសម្រាប់ការកាត់បន្ថយភាពក្រីក្រ និងការអភិវឌ្ឍន៍មានចីរភាព។
សេចក្តីប្រកាសព័ត៌មាន ក៏បានបន្ថែមថា សន្និសីទនេះ ក៏មានគោលបំណង ផ្តោតជាពិសេសលើវិស័យនានា ដែលប៉ះពាល់ដោយសារវិបត្តិសកលលោក និងទស្សនវិស័យផ្សេងៗ ដើម្បីកំណើននាពេលអនាគត។
សន្និសីទនាថ្ងៃពុធ ទី១៧មីនា នឹងមានបទបង្ហាញជាច្រើន ស្តីពី ទិដ្ឋភាពផ្សេងៗ ដើម្បីឲ្យប្រទេសកម្ពុជា សម្រេចបានកំណើនសេដ្ឋកិច្ចខ្ពស់ឡើងវិញ និងប្រកបដោយចីរភាព ព្រមទាំងបទបង្ហាញ និងការពិភាក្សាជាច្រើនទៀត អំពីវិស័យជម្រុញកំណើននានា ដូចជា កសិកម្ម ការអភិវឌ្ឍន៍ជនបទ ឧស្សាហកម្មកំពុងផុសឡើង ហេដ្ឋារចនាសម្ព័ន្ធ ថាមពល និងទេសចរណ៍។
សម្តេចនាយករដ្ឋមន្ត្រី ហ៊ុន សែន នឹងចូលរួមថ្លែងសន្ទរកថាគន្លឹះ ដើម្បីបើកអង្គសន្និសីទ នាថ្ងៃពុធ ទី១៧ ខែមីនា ឆ្នាំ២០១០ ក្រោមប្រធានបទ ការសម្រេចបានកំណើនសេដ្ឋកិច្ចខ្ពស់ឡើងវិញៈ អាទិភាពខាងគោលនយោបាយ និងសកម្មភាព ដើម្បីកំណើន និងការអភិវឌ្ឍន៍មានចីរភាព៕
Filed Under:
ពត៌មានជាតិ