ក្រុមហ៊ុនអាមេរិកចុះបញ្ជីវិនិយោគនៅកម្ពុជាច្រើន តែទុនវិនិយោគតិច
lookandcomment
|
Monday, March 15, 2010
|
ភ្នំពេញ: មន្ត្រីទូតអាមេរិកបានឲ្យដឹងថា មកដល់ពេលនេះក្រុមហ៊ុនអាមេរិក ដែលបានចុះបញ្ជីនៅក្នុងប្រទេសកម្ពុជា គឺមានទាំងអស់ចំនួន ៦៤៣ ក្រុមហ៊ុន ប៉ុន្តែទុនវិនិយោគមានត្រឹមតែ ៧១ លានដុល្លារ ។ លោក ចន ចនសុន (John Johnson) អ្នកនាំពាក្យស្ថានទូតអាមេរិកប្រចាំនៅក្នុងប្រទេស បានប្រាប់អ្នកកាសែតតាមរយៈអ៊ីម៉ែល កាលពីថ្ងៃទី១១ ខែមីនា កន្លងទៅនេះថា បើតាមស្ថិតិរបស់ក្រសួងពាណិជ្ជកម្មរបស់កម្ពុជា មានក្រុមហ៊ុនអាមេរិករហូតដល់ទៅ ៦៧៣ ក្រុមហ៊ុនបានចុះបញ្ជី ប៉ុន្តែបើនិយាយអំពីទុនវិញ គឺមានត្រឹមតែ ៧១ លានដុល្លារប៉ុណ្ណោះ ។ លោកបានបញ្ជាក់ថា “តាំងពីឆ្នាំ១៩៩៤ មកក្រុមប្រឹក្សាអភិវឌ្ឈន៍កម្ពុជាបានចុះបញ្ជីថា ទុនវិនិយោគរបស់អាមេរិកនៅក្នុងប្រទេសកម្ពុជា មានចំនួនប្រហាក់ប្រហែលត្រឹមតែ ៧១ លានដុល្លារតែប៉ុណ្ណោះ” ។
រហូតមកដល់ពេលនេះ អ្នកវិនិយោគទុនដែលធំជាងគេនៅក្នុងប្រទេសកម្ពុជា គឺមានចិន មានកូរ៉េខាងត្បូង វៀតណាម ថៃ រុស្សី ជាដើម ។ ប៉ុន្តែប្រទេសធំដូចជា ជប៉ុន និងអាមេរិក គឺនៅមានចំនួនតិចតួចបំផុត ។ តាមការអះអាងនៅក្នុងអ៊ីម៉ែល លោក ចន សកម្មភាពទាក់ទាញវិនិយោគនៅក្នុងប្រទេសកម្ពុជា នៅប្រឈមមុខនឹងបញ្ហាមួយចំនួន ដែលរួមមានដូចជា រឿងអំពើពុករលួយជាដើម ។
លោកបានបញ្ជាក់ថា “កម្ពុជាគឺជាប្រទេសដែលមានរបបសេរី និងបើកចំហរសំរាប់ការ បណ្តាក់ទុនបរទេស ហើយជាផ្លូវការតែងតែស្វាគមនូវការវិនិយោគទុនដោយផ្ទាល់ពីបរទេស ទាំងឡាយ ហើយមក ប៉ុន្តែទោះបីជាយ៉ាងណាវាមានឧបសគ្គច្រើននៅឡើយដូចជា ពុករលួយ ការិយាល័យធិបតេយ្យ កង្វះខាតហេដ្ឋារចនាសម្ព័ន្ធ និងតម្លៃថាមពលខ្ពស់ជាដើម” ។
ទាក់ទងនឹងវិនិយោគរវាងអាមេរិក និងកម្ពុជានេះកាលពីចុងឆ្នាំ២០០៩ កន្លងទៅនេះ អាមេរិកបានប្រកាសដកកម្ពុជាចេញពីបញ្ជីខ្មៅ លើផ្នែកពាណិជ្ជកម្មរបស់ខ្លួន ហើយក្រោយមករដ្ឋាភិបាលអាមេរិក បានសំរេចអនុញ្ញាតឲ្យធនាគារនាំចេញនាំចូលអាមេរិកផ្តល់ប្រាក់កម្ចី ដល់ក្រុមហ៊ុនអាមេរិកទាំងឡាយ ដែលមានបំណងចង់វិនិយោគនៅក្នុងប្រទេសកម្ពុជា ។
ជុំវិញបញ្ហានេះ លោក ចន បានឲ្យដឹងថា ដំណើរការនេះគឺវាត្រូវទាមទារឲ្យមាននូវដំណើរការជាច្រើនដូចជា ការស្វែងរកដៃគូជាមួយធនាគារពាណិជ្ជណាមួយជាដើម នៅមុនពេលវាអាចនឹងដំណើរការទៅបាន ប៉ុន្តែមកដល់ពេលនេះខ្ញុំក៏នៅមិនទាន់ដឹងថា តើវាដើរទៅដល់ណាហើយដែរ ។
កាលពីឆ្នាំ ២០០៨ ការិយាល័យតំណាងពាណិជ្ជកម្មអាមេរិកបានឲ្យដឹងថា តម្លៃពាណិជ្ជកម្មរបស់កម្ពុជា និងអាមេរិកគឺមានតម្លៃ ២.៦ ពាន់លានដុល្លារ ។ នៅក្នុងនោះកម្ពុជានាំចេញទៅ អាមេរិកគឺមានតម្លៃ ២.៤ ពាន់លានដុល្លារ ហើយអាមេរិកនាំចេញមកកាន់ប្រទេសកម្ពុជាមាន តម្លៃត្រឹមតែ ១៥៤ លានដុល្លារតែប៉ុណ្ណោះ ៕
Filed Under:
សេដ្ឋកិច្ច