បុកសិស្សវិទ្យាល័យពួកស្លាប់ម្នាក់ ហើយរត់ចោលឡានដែលក្រឡាប់
lookandcomment
|
Monday, March 15, 2010
|
ភ្នំពេញ: ឡានទួរីសមួយគ្រឿងបានបុកសិស្សវិទ្យាល័យពួកម្នាក់ឱ្យស្លាប់នៅ កន្លែងកើតហេតុ ហើយតៃកុងឡានបានរត់គេចខ្លួនបាត់ ។ គ្រោះថ្នាក់ចរាចរណ៍កើតឡើងកាលពីម៉ោង៨ និង ៤០នាទីព្រឹក ថ្ងៃទី១២ ខែមីនា ស្ថិតនៅតាមបណ្តោយផ្លូវជាតិលេខ៦ ត្រង់ចំហៀងមុខវិទ្យាល័យពួក ប្រមាណ ២០ ម៉ែត្រ ក្នុងភូមិប្រយុទ្ធ ឃុំពួក ស្រុកពួក ខេត្តសៀមរាប ។ ជនរងគ្រោះឈ្មោះ មាន សិទ្ធ ភេទស្រី អាយុ ១៧ឆ្នាំ ជាសិស្សថ្នាក់ទី៧ នៃវិទ្យាល័យពួក ។ រថយន្តបានបុកនាងពីក្រោយយ៉ាងពេញទំហឹង ខណៈពេលដែលរថយន្តបើកស្របទិសគ្នា ពីកើតទៅលិច ហើយយុវតីរងគ្រោះកំពុងជិះកង់ចេញពីសាលាសំដៅទៅគេហដ្ឋានរបស់ខ្លួន នៅភូមិអូរតាប្រាក់ ឃុំពួក ស្រុកពួក ។
នគរបាលស្រុកពួកនិយាយថា រថយន្តបង្កធុនទួរីសសាំយ៉ុង ចំណុះ ១៥ កៅអី ពាក់ស្លាកលេខកំពង់ស្ពឺ 2A 0189 បើកបរដោយឈ្មោះ ជួន សុផានិត ភេទប្រុស អាយុ ១៩ឆ្នាំ បានក្រឡាប់ផ្ងារជើងបន្ទាប់ពីបុកកូនសិស្សស្លាប់រួច ។ តាមរយៈឯកសារបន្សល់ទុក ប៉ូលិសដឹងថា តៃកុងឡានមានទីលំនៅភូមិខ្វៀន សង្កាត់គោកចក ក្រុងសៀមរាប ខេត្តសៀមរាប ។ មានអ្នករួមដំណើរម្នាក់ទៀត មិនមានរងរបួសអ្វីឡើយ ក៏បានគេចខ្លួនបាត់ទៅ ។
សមត្ថកិច្ច បញ្ជាក់ថា រថយន្តបង្កខាងលើបានបើកយ៉ាងលឿនហួសល្បឿនកំណត់ ៕
Filed Under:
បទល្មើស ឧក្រិដ្ឋ