យោធាថៃអះអាងថាវត្តមានយោធាយ៉ាងច្រើនក្នុងក្រុង ដើម្បីរក្សាសន្តិភាព មិនមែនរដ្ឋប្រហារទេ
lookandcomment
|
Friday, March 12, 2010
|
របាយការណ៍សារព័ត៌មាន ដែលនិយាយថា នឹងមានរដ្ឋប្រហារយោធាមួយ នៅមុនថ្ងៃពួកអាវក្រហមធ្វើបាតុកម្ម “ ផ្តាច់ព្រាត់ ” នាថ្ងៃអាទិត្យនេះ គ្រាន់តែពាក្យចចាមរ៉ាម ។
អ្នកនាំពាក្យរដ្ឋាភិបាលស្តីទីលោក ផានិតតាន់ វ៉ាតតាណាយ៉ាខន បាននិយាយនៅព្រឹកថ្ងៃព្រហស្បតិ៍ថា “ រដ្ឋាភិបាលបាន ឆែកមើលព័ត៌មាននិងបានរកឃើញថា វាគ្មានហេតុផល ។ នៅពេលសភាពការណ៍ មិនធម្មតាកើតឡើង តែងមានពាក្យចចាមអារ៉ាមដូច្នេះ ” ។
លោកបាននិយាយថា ពាក្យចចាមអារ៉ាមនេះ ត្រូវគេបំផុសយ៉ាងសុសសាយជាពិសេស នៅពេលប្រជាជនឃើញទាហាន ចល័តចេញចូលបន្ទាយ ដើម្បីរក្សាសន្តិភាព និងសណ្តាប់ធ្នាប់ក្រោមច្បាប់សន្តិសុខផ្ទៃក្នុង ។
ឧត្តមសេនីយ៍ទោ ឌិតថាផន សាសាស្មីត អ្នកនាំពាក្យបញ្ជាការ ប្រតិបត្តិការសន្តិសុខផ្ទៃក្នុង បាននិយាយថា តាំងពីព្រឹកព្រលឹមថ្ងៃព្រហស្បតិ៍ យោធាបានបង្កើតចំណុចឆែកឆេរ នៅក្នុងក្រុងបាងកកនិងនៅខេត្តជិតៗនោះ ចំនួន៧ទៀតនៅពេលថ្ងៃអនុវត្តច្បាប់ សន្តិសុខផ្ទៃក្នុងបានចាប់ផ្តើម ហើយសភាពការណ៍ធម្មតាទេ ។
ទាហានក៏នឹងត្រូវដាក់ពង្រាយ នៅពេលក្រោយមកទៀត នៅបណ្តាខេត្តជិតៗ ទីក្រុងបាងកកជាពិសេសនៅតាមផ្លូវ ឆ្ពោះមកកាន់ទីក្រុងបាងកកក្នុងពេល ពួកអាវក្រហមចាប់ផ្តើម ធ្វើដំណើរចូលមកធ្វើមហាបាតុកម្ម នៅកណ្តាលក្រុងបាងកក ។
ឧត្តមសេនីយ ឌិតថាផន នៅតែនិយាយថា យោធានឹងមិនឆ្លៀតឱកាសធ្វើរដ្ឋប្រហារ ដូចពាក្យចចាមអារ៉ាមទេ ។ “ វត្តមានយោធា យ៉ាងច្រើននៅក្នុងក្រុង និងខេត្ត៧ទៀត គឺដើម្បីរក្សាសន្តិភាព មិនមែនដើម្បីធ្វើរដ្ឋប្រហារទេ ” ។
ក្នុងពេលជាមួយគ្នា អាជ្ញាធរអាកាសយានដ្ឋានធំ របស់ថៃដែលត្រូវបានបាតុករ ចូលកាន់កាប់កាលពី ឆ្នាំ២០០៨ បាននិយាយថា ខ្លួនបានធ្វើផែនការគ្រាអាសន្នមួយ សំរាប់ការប្រឆាំងតវ៉ា នៅចុងសប្តាហ៍នេះ នៅពេលអតីតនាយករដ្ឋមន្ត្រីលោក ថាក់ស៊ីន អំពាវនាវអោយអ្នកគាំទ្រ ចូលរួមការជួបជុំប្រឆាំងតវ៉ានេះ ។
អាជ្ញាធរអាកាសយានដ្ឋានសុវណ្ណភូមិ បាននិយាយថា ផែនការនេះដើម្បី ដោះស្រាយជាមួយការរំខានដល់ ការធ្វើដំណើរឬការបិទខ្ទប់ ដែលអាចកើតមាន ចាប់ពីថ្ងៃ១១ដល់២៣មីនា ។
ចំណែកក្រសួងគមនាគមន៍ក៏បាន ចាត់វិធានាការដើម្បីធានាថា អ្នកធ្វើដំណើរអាចប្រើស្ថានីយរថយន្តក្រុង និងអាកាសយានដ្ឋាននៅទូទាំងប្រទេសដូចធម្មតា នៅក្នុងអំឡុងពេលបាតុកម្មនេះ ។ ពួកមេដឹកនាំអាវក្រហមកាលពីថ្ងៃពុធ បានប្តេជ្ញាប្រមូលបាតុករ អោយបានមួយលាននាក់ ដើម្បីទម្លាក់រដ្ឋាភិបាល ។
ចាទូផន ប្រូមផាន បានប្រាប់សន្និសីទកាសែតថា ពួកអាវក្រហមត្រូវបានណែនាំ អោយដើរឬបុកទំលុះរបាំងឆែកឆេរ តាមផ្លូវដើម្បីធ្វើយ៉ាងណាអោយចូលមកដល់ទីក្រុងបាងកកនិងថា ប៉ូលិសនិងទាហានដែលឃាត់ពួកអាវក្រហម មិនអោយចូលក្រុងនឹងខុសច្បាប់ ។
ការប្រឆាំងតវ៉ានៅចុងសប្តាហ៍នេះ កើតឡើងពីរសប្តាហ៍ក្រោយតុលាការកំពូលថៃ បានរឹបអូសទ្រព្យសម្បត្តិ១.៤០០ ដុល្លាររបស់លោក ថាក់ស៊ីន ក្នុងចំណោមទ្រព្យ២.៣០០លានដុល្លារ របស់គ្រួសារលោក ដែលត្រូវគេបង្កកទុកតាំងពី ក្រោយរដ្ឋប្រហារឆ្នាំ២០០៦ ៕
Filed Under:
ដំណឹងអន្តរជាតិ