ខឹងនឹងតាស្តីឱ្យបន្តិចបន្តួច ជិះម៉ូតូបុកឡានសម្លាប់ខ្លួន
lookandcomment
|
Tuesday, March 16, 2010
|
កំពង់ធំ: យុវសិស្សថ្នាក់ទី១០ រៀននៅវិទ្យាល័យហ៊ុនសែនតាំងគោក គ្រាន់តែជីតាបង្កើតស្តីបន្ទោសកុំឱ្យដើរលេងយប់ច្រើនពេក ក៏ខឹងនឹងជីតាជិះម៉ូតូបុករថយន្តសម្លាប់ខ្លួន ។យុវសិស្សនេះ មានឈ្មោះ ឡេង សូនី អាយុ ១៧ឆ្នាំ មានឪពុកម្តាយរស់នៅភូមិបាខម ឃុំសំពងជ័យ ស្រុកជើងព្រៃ ខេត្តកំពង់ចាម ។ គេមកសម្រាករៀន សូត្រនៅជាមួយជីតាបង្កើត រស់នៅភូមិតាំងគោក ឃុំសូយោង ស្រុកបារាយណ៍ ខេត្តកំពង់ធំ ។ ចំណែករថយន្តទួរីស រត់ឈ្នួលដែលបើកបរដោយឈ្មោះ ញ៉ែម សុផល រស់នៅផ្ទះមិនឆ្ងាយពីសាកសពផ្ទះជនរងគ្រោះឡើយ ។
លោក អនុសេនីយ៍ទោ អ៊ឹម វ៉ុន មេប៉ុស្តិ៍ឃុំសូយោង បាននិយាយឱ្យដឹងថា នៅល្ងាចថ្ងៃទី១៤ ខែមីនា ២០១០ វេលាម៉ោងប្រហែលប្រាំបីយប់ ឈ្មោះ ឡេង សូនី មិនដឹងមកពីដើរលេងកន្លែងណាទេ រួចហើយក៏ជិះម៉ូតូម៉ាកវ៉េវគ្មានស្លាកលេខចូលផ្ទះ ។ ឃើញដូច្នេះជីតាបង្កើតរបស់សូនី ក៏ស្តីបន្ទោសពីរឿង ដើរលេងយប់ ឱ្យខិតខំប្រឹងរៀនសូត្រ តែឈ្មោះ សូនី បានឆ្លើយតបជាមួយជីតាវិញថា បើចង់សម្លាប់ ក៏សម្លាប់មក មិនបាច់និយាយច្រើនទេ ហើយឈ្មោះនេះ ក៏ជិះម៉ូតូចេញមកផឹកស្រានៅមុខផ្សារតាំងគោក ហើយនិយាយឱ្យជីតាវិញថា ចាំទៅយកម៉ូតូ និងខ្មោចមកផង ។
លោក អ៊ឹម វុន និយាយបន្ថែមទៀតថា លុះចេញមកដល់មុខផ្សារ ឈ្មោះ សូនី ក៏បបួលគ្នា ៣-៤ នាក់ទៀត ដែលជាមិត្តភ័ក្តិមកអង្គុយផឹកស្រាឱ្យស្រវឹង ហើយនិយាយថា អញត្រូវជិះម៉ូតូបុកឡានឱ្យស្លាប់ ទោះបីមានមិត្តភ័ក្តិ ៣-៤ នាក់អង្វរ ក៏មិនស្តាប់ដែរ ។ គាប់ជួននៅពេលនោះ ឈ្មោះ សូនី ឃើញរថយន្តទួរីស បើកដឹកអ្នកទៅលេងបុណ្យនៅវត្តស្វាយភ្លើង រូបគេឃើញដូច្នេះ ក៏បញ្ឆេះម៉ូតូបើកបុករថយន្តចំពីមុខតែម្តង ទោះជាមានអ្នកជួយដណ្តើមសោម៉ូតូ និងជួយឃាត់កុំឱ្យធ្វើដូច្នេះក៏ដោយ ។
សាកសព ឡេង សូនី របួសបាក់ក ហូរឈាមតាមត្រចៀក បាក់ជើង ។ សាកសពត្រូវបានមិត្តភ័ក្តិ យកទៅតម្កល់ទុកនៅផ្ទះភូមិតាំងគោកទាំងយប់ដើម្បីធ្វើបុណ្យ ចំណែកឯរថយន្តត្រូវបានប៉ូលិសប៉ុស្តិ៍អូសទៅរក្សាទុក រង់ចាំការដោះស្រាយ ៕
Filed Under:
បទល្មើស ឧក្រិដ្ឋ