ផាវ ភឿក តស៊ូជាមួយ ពេជ្រ សីហា
lookandcomment
|
Wednesday, March 17, 2010
|
ភ្នំពេញ: លើសង្វៀន TV5 យប់ថ្ងៃទី ១៩ មីនា ខាងមុខនេះ អ្នកប្រដាល់ចិត្តខ្លាំង ផាវ ភឿក ក្លឹបកងពលធំអន្តរាគមន៍លេខ៣ ប្រកាសវ៉ៃជាមួយ ពេជ្រ សីហា ក្លឹបក្រសួងការពារជាតិ ។
អ្នកប្រដាល់ទាំង ២ រូបនេះ ពុំធ្លាប់ជួបប្រកួតគ្នាពីមុនមកនោះទេ ។ អ្នកប្រដាល់រូបនេះ ល្អដូចគ្នាចិត្តធំ និងហ៊ានដូចគ្នា តែជីវិតលើសង្វៀន ផាវ ភឿកចាស់វស្សាជាង គ្រាន់តែ សីហា មានឈ្មោះបោះសំលេងជាងតែប៉ុណ្ណោះ ។
សីហា មិនមានទម្លាប់ វ៉ៃប្តូរទេ តែកណ្តាប់ដៃ អ្នកប្រដាល់រូបនេះ តែងតែធ្វើឲ្យគូរប្រកួតតដៃលែងកើត ។ គេវ៉ៃស្លូត រហ័សរហួន ប៉ុន្តែក៏ឆាប់ ទ្រុឌទ្រោមកំលាំងដែរ ។
ផាវ ភឿក និងពេជ្រ សីហា ជួបគ្នាលើកដំបូងបែបនេះ នរណាមានសំណាងល្អទៅហ្ន៎?
វ៉ែន សុវណ្ណ ក្លឹបកងកេង ខេត្តបាត់ដំបង ប្រកួតជាមួយ ឌុល រដ្ឋា ក្លឹបអេភូថង ។ប្រវត្តិប្រកួតកន្លងមក ពួកគេពុំធ្លាប់ប្រកួតគ្នាឡើយ សុវណ្ណ ពូកែកណ្តាប់ដៃ និងទាត់ល្អ ជង្គង់និងកែងរបស់គេមិនអស្ចារ្យឡើយ តែអាចធ្វើឲ្យគូរប្រកួត វេទនាបាន ។
រដ្ឋា ក៏មានកលល្បិច វ៉ៃល្អដែរ តែការវ៉ៃចេញរបស់គេ មិនសូវច្បាស់ឡើយ ។
វ៉ែន សុវណ្ណ និងឌុល រដ្ឋា មិនដឹងថា នរណាជាអ្នកឈ្នះនោះឡើយ ។
ឆាំ រ៉ែម ក្លឹបសិង្ហកីឡា ប្រកាសវ៉ៃសងសឹកជាមួយរាជសីហ៍ ចាន់ ឌី ក្លឹបបង្ក្រាបគ្រឿងញៀន ។
ពួកគេជួបគ្នាចុងក្រោយ នៅថ្ងៃទី ៥ មីនាកន្លងមក ហើយការជួបប្រកួតនេះ ឆាំ រ៉ែម ចាញ់ពិន្ទុរាជសីហ៍ ចាន់ ឌី ដាច់តែម្តង ។ឡើងវ៉ៃសងសឹកលើកនេះ មិនដឹងថា ឆាំ រ៉ែម ជួបសំណាងល្អ ឬក៏ជាការបន្ថែមស្ថិតិឈ្នះឲ្យ ចាន់ ឌី បន្ថែមនោះឡើយ ។
ជើងខ្លាំងវ័យក្មេង អ៊ាង សំអាត ក្លឹបតាព្រហ្មមានជ័យ ប្រកួតជាមួយវង្ស រិទ្ធី ក្លឹបគ្រុឌមានជ័យ ។
សំអាត នរណាក៏ទទួលស្គាល់ថា ជាជើងខ្លាំងដែរ ឯរិទ្ធី មិនសូវមានគេស្គាល់នោះទេ ។ មន្ត្រីខាងផ្គូរផ្គងនិយាយថា វង្ស រិទ្ធី មិនអន់ទេ បើខ្សោយគេមិនហ៊ានតស៊ូជាមួយអ៊ាង សំអាត ឡើយ ៕
Filed Under:
ពត៌មានជាតិ