ប្រមុខរាជរដ្ឋាភិបាលកម្ពុជា ដាក់បទបញ្ជា មិនឲ្យកងទ័ពកម្ពុជា ជ្រៀតជ្រែករឿងថៃ
lookandcomment
|
Monday, March 15, 2010
|
ភ្នំពេញ: សម្តេចប្រមុខរាជរដ្ឋាភិបាលកម្ពុជា បានដាក់បទបញ្ជាយ៉ាងម៉ឹងម៉ាត់នៅថ្ងៃនេះ ដោយមិនអនុញ្ញាតឲ្យមានការចល័តកងទ័ពកម្ពុជា នៅតាមព្រំដែន និងមិនអនុញ្ញាតឲ្យកម្លាំងកម្ពុជាធ្វើសកម្មភាពអ្វីនៅតាមបណ្តោយ ព្រំដែនកម្ពុជា-ថៃ ឡើយ ។ បទបញ្ជារបស់ប្រមុខរាជរដ្ឋាភិបាលខាងលើនេះ ត្រូវបានដាក់ចេញចំពេលដែលប្រទេសថៃកំពុងតែវឹកវរ ដោយសារបាតុកម្មអាវក្រហមរាប់ម៉ឺននាក់ ដែលគាំទ្រអតីតនាយករដ្ឋមន្ត្រីថៃ ថាក់ស៊ីន កំពុងតែធ្វើបាតុកម្មយ៉ាងខ្លាំងក្លា នៅទីក្រុងបាងកក ដើម្បីប្រឆាំងនឹងនាយករដ្ឋមន្ត្រីថៃ អាប់ភីស៊ីត វេចាជីវ៉ា ។
ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា នៅវិទ្យាស្ថានជាតិអប់រំ កាលពីព្រឹកថៃ្ងច័ន្ទ ទី១៥ ខែមីនានេះ សម្តេចនាយករដ្ឋមន្ត្រី ហ៊ុន សែន បានប្រកាសថា កងទ័ព និងអាជ្ញាធរកម្ពុជា នៅតាមព្រំដែនថៃ ត្រូវទំនាក់ទំនងជាមួយអាជ្ញាធរថៃ ដើម្បីរក្សាទំនាក់ទំនងល្អជាមួយនឹងគ្នាជាធម្មតា ។
ជាមួយគ្នានោះ សម្តេចនាយករដ្ឋមន្ត្រី ហ៊ុន សែន ក៏បានដាក់បទបញ្ជាទៅកាន់លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ និងលោកនាយឧត្តមសេនីយ៍ ប៉ុល សារឿន អគ្គមេបញ្ជាការកងទ័ពកម្ពុជា ដើម្បីត្រួតពិនិត្យកម្លាំងកងទ័ពកម្ពុជា តាមបណ្តោយព្រំដែនកម្ពុជា-ថៃ ។
សម្តេចនាយករដ្ឋមន្ត្រី បានគូសបញ្ជាក់ថា កងទ័ពកម្ពុជា ត្រូវរក្សាភាពស្ងៀមស្ងាត់ ដោយមិនត្រូវចល័តកម្លាំងនៅតាមព្រំដែនឡើយ ដើម្បីកុំឲ្យមានការយល់ច្រលំ ។ កម្ពុជា សូមប្រកាសថា មិនឆ្លៀតឱកាសពេលដែលថៃកំពុងវឹកវររឿងផ្ទៃក្នុង បែរជាយើងធ្វើសកម្មភាពណាមួយនោះទេ ។ កម្ពុជា ក៏មិនបង្កអរិយភាព ដោយបញ្ឆេះបញ្ហាព្រំដែនក្នុងពេលដែលថៃ កើតមានបញ្ហានោះឡើយ ។
ក្នុងពេលប្រកាសដូច្នេះ សម្តេចនាយករដ្ឋមន្ត្រី ហ៊ុន សែន ក៏បានអំពាវនាវទៅកាន់ប្រជាជនកម្ពុជា ដែលធ្វើការនៅប្រទេសថៃ ទាំងអ្នកស្របច្បាប់ និងមិនស្របច្បាប់ ដោយមិនត្រូវចូលរួមក្នុងបាតុកម្មនៅប្រទេសថៃឡើយ ។ ម្យ៉ាងទៀត ចំពោះប្រជាជនកម្ពុជា នាពេលនេះ បើអាចជៀសវាងបាន ក៏គួរកុំធ្វើដំណើរទៅកាន់ទីក្រុងបាងកក មុនពេលដែលបាតុកម្មថៃ ត្រូវបានរំសាយ ។ ចំណែកការទាក់ទង រកស៊ី លក់ដូរ នៅតាមព្រំដែន ត្រូវធ្វើជាធម្មតា ។
សម្តេចតេជោ ហ៊ុន សែន បានបញ្ជាក់ថា សិទ្ធិធ្វើបាតុកម្មរបស់ក្រុមអាវក្រហម អាវលឿង ដើម្បីផ្លាស់ប្តូរណាមួយ នៅប្រទេសថៃ គឺជាសិទ្ធិរបស់ប្រជាជនថៃ ដែលគេអាចដោះស្រាយបញ្ហាផ្ទៃក្នុងរបស់គេ ។ ដូច្នេះប្រជាជនកម្ពុជា មិនត្រូវពាក់ព័ន្ធនឹងរឿងនោះទេ ។
សម្តេចនាយករដ្ឋមន្ត្រី ហ៊ុន សែន ក៏បានប្រកាសបដិសេធនូវការអះអាងរបស់ក្រុងបាងកក ដែលថា អតីតនាយករដ្ឋមន្ត្រីថៃ ថាក់ស៊ីន នៅកម្ពុជា ។
សម្តេចតេជោ ហ៊ុន សែន បានបន្ថែមថា កម្ពុជាគ្មានការលាក់លៀមទេ បើ ថាក់ស៊ីន មកកម្ពុជា គឺបញ្ចាំងក្នុងទូរទស្សន៍ហើយ ។ ប៉ុន្តែពេលនេះ ថាក់ស៊ីន មិនបានមកកម្ពុជាទេ ៕
Filed Under:
ដំណឹងសំខាន់ៗ ប្រចាំថ្ងៃ
,
នយោបាយ