អោក សុមារី លាតត្រដាងពីការបែកបាក់ជាមួយលោក សូត្រ មុនី
lookandcomment
|
Monday, March 15, 2010
|
ភ្នំពេញ: ជាង ៥ ខែកន្លងមកហើយ ដែលលោកសូត្រ មុនី បានវេចសម្ពាយចុះចោលនាង អោក សុមារី ឬអោក សុម៉ារីម៉ា ហើយវិលទៅផ្តើមស្នេហ៍ជាថ្មីលើទ្រនំចាស់ជាមួយនឹងប្រពន្ធដើមវិញ ។ ព័ត៌មានដែលគេខំលាក់បាំងនេះ ត្រូវបានទម្លាយឲ្យដឹងតាមរយៈម្តាយរបស់អ្នកនាង អោក សុមារី, គាត់និយាយថា “ខ្ញុំមានការសោកស្តាយណាស់ ដែលកូនទាំងពីរចែកផ្លូវគ្នា” ។ គេនៅចាំបានថា កាលពីដើមឆ្នាំ២០០៦ នាង អោក សុមារី និងម្តាយរបស់នាងបាននាំគ្នាទៅផ្ទះអ្នកស្រី លីន ចន្ធូ ដែលជាប្រពន្ធរបស់លោក សូត្រ មុនី នៅខាងត្បូងផ្សារពោធិចិនតុង ហើយត្រូវអ្នកស្រី លីន ចន្ធូ ប្តឹងទៅតុលាការក្រុងភ្នំពេញ ដោយចោទប្រកាន់ថា បានវាយប្រហារទៅលើអ្នកស្រី ប៉ុន្តែនាង អោក សុមារី បានបដិសេធថា នាងគ្រាន់តែទៅតាមយកប្តីរបស់ខ្លួនឲ្យត្រឡប់ទៅវិញប៉ុណ្ណោះ ។ រឿងរ៉ាវប្រទូស្ដរ៉ាយនេះបានស្ងប់ស្ងាត់ទៅវិញ បន្ទាប់ពីតុលាការក្រុងកោះហៅនាង អោក សុមារី និងលោកសូត្រ មុនី ឡើងទៅបំភ្លឺចំពោះការចោទប្រកាន់នោះ នាខែមេសា ឆ្នាំ២០០៧ ហើយលោកសូត្រ មុនី និងអ្នកនាង អោក សុម៉ារី បានបន្តរស់នៅជាមួយគ្នាក្នុងនាមជាប្តីប្រពន្ធ រហូតមានកូនប្រុសមួយ និងកូនស្រីមួយ ។ ក្នុងនាមជាភរិយាទី២ ដោយគ្រាន់តែឆ្លងកាត់ពិធីភ្ជាប់ពាក្យជាមួយគ្នា នៅស្រុកកំណើតរបស់នាងនៅឯខេត្តបាត់ដំបង កាលពីអំឡុងឆ្នាំ២០០៥នោះ ឥឡូវនេះបានឈានដល់ការបែកបាក់ចែកផ្លូវគ្នាហើយ ។
អ្នកស្រី ទី សោភ័ណ្ឌ អាយុ៤៧ ឆ្នាំ បាននិយាយប្រាប់ថា “កូនស្រីខ្ញុំ អោក សុមារី និងកូនប្រសា សូត្រ មុនី មិនគួរណាឈានដល់ការបែកបាក់គ្នាទាំងស្រុងដូច្នេះសោះ គួរឲ្យសោកស្តាយខ្លាំងណាស់ ។ ខ្ញុំស្រឡាញ់កូនប្រសាជាងកូនស្រីខ្ញុំទៅទៀត រឿងដែលមិនគួរកើតបែរជាកើតឡើងបាន” ។ តារាចម្រៀង អោក សុមារី បាននិយាយប្រាប់ថា “ការបែកបាក់នេះ គឺបណ្តាលមកពីការរស់នៅមិនចុះសម្រុងនឹងគ្នា ។ ប្តីរបស់ខ្ញុំទៅណា មកណាមិនសូវជាផ្តល់ដំណឹងឲ្យដឹងទេ ចំណែកកូនទាំងពីរ គឺកូនប្រុសអាយុ៤ ឆ្នាំ និងកូនស្រីប្អូន អាយុជាងមួយឆ្នាំ កំពុងរស់នៅជាមួយនឹងខ្ញុំ ។ ចំពោះទ្រព្យសម្បត្តិនាងខ្ញុំមិនទាមទារអ្វីពីគាត់ទេ ត្បិតកន្លងមកនាងខ្ញុំធ្លាប់កម្សត់កម្រ ក៏ដោយសារកម្លាំងខ្លួនឯងដែរ” ។
អ្នកនាង អោក សុមារី មិនបានបញ្ជាក់ឲ្យច្បាស់លាស់ថា តើអាចវិលមកជួបជុំគ្នាវិញ ឬយ៉ាងណានោះទេ ដោយអ្នកនាងគ្រាន់តែនិយាយថា “ជាធម្មតាមនុស្សម្នាក់ៗមើលមិនឃើញពីថ្ងៃស្អែកឡើយ តែឥឡូវនេះខ្ញុំត្រូវការភាពស្ងប់ស្ងាត់ ដើម្បីការងារសិល្បៈវិញ ព្រោះត្បិតកន្លងមកខ្ញុំរងការឈឺចាប់ច្រើនពេកហើយ” ។
មជ្ឈដ្ឋានមួយចំនួនបានផ្តោតការសង្ស័យថា មូលហេតុនៃការបែកបាក់នេះអាចបណ្តាលមកពីអ្នកនាង អោក សុមារី មានទំនាក់ទំនងជាមួយនឹងបុរសជនជាតិបារាំងដ៏ស្រស់សង្ហារម្នាក់ ព្រោះគេឧស្សាហ៍ឃើញអ្នកទាំងពីរ បណ្តើរគ្នាទៅញ៉ាំអាហារនៅភោជនីយដ្ឋានតាតាជាញឹកញាប់ ប៉ុន្តែព័ត៌មាននេះ ត្រូវនាងបដិសេធថា បុរសជនជាតិបារាំងនោះ គឺជាមិត្តភក្តិឪពុកម្តាយធម៌ របស់នាងនៅសហរដ្ឋអាមេរិក ពួកគាត់ស្គាល់រាប់អានគ្នាតាំងពីអ្នកនាងទៅសម្តែងនៅអាមេរិក កាលពីប៉ុន្មានឆ្នាំមុនម្ល៉េះ ហើយថ្មីៗនេះពួកគាត់មកលេងស្រុកខ្មែរ រួមជាមួយនឹងបុរសនោះក៏មកលេងដែរ ។ ម្តងម្កាលពួកគាត់បានទៅញ៉ាំអាហាររួមគ្នាមិនញឹកញាប់ទេ បុរសនោះមិនមែនជាគូស្នេហ៍ទេ ហើយក៏មិនស្និទ្ធស្នាលដែរ ។
អ្នកស្រី ទី សោភ័ណ្ឌ បានរំលឹកពីអតីតកាលមុនការបែកបាក់របស់កូនស្រីគាត់ ជាមួយនឹងលោកសូត្រ មុនីថា កាលពីដំបូងឡើយពួកគេទាំងពីរស្រឡាញ់គ្នាណាស់ ពាក្យសម្តីផ្អែមល្ហែម ទៅណាមកណាត្រសងទាំងគូមានចំណី មួយម៉ាត់ក៏ចែកគ្នាដែរ មិនដែលមានពាក្យរកាំរកូសមួយម៉ាត់ណាទេ ។ ប៉ុន្តែគួរឲ្យសង្វេគណាស់ ជិតកន្លះឆ្នាំមកនេះ កូនស្រីខ្ញុំ (អោក សុមារី) នាងបានដេកឱបទុក្ខក្រៀមក្រំតែម្នាក់ឯង ដោយសារកូនប្រសាខ្ញុំ(សូត្រមុនី) បានលបលួចទៅមានស្រីថ្មី រួចទៅសាងស្នេហ៍ជាថ្មីជាមួយនឹងប្រពន្ធដើមវិញ ។
អ្នកស្រីបញ្ជាក់បន្ថែមថា កូនប្រសាខ្ញុំ(លោកសូត្រមុនី) មិនសូវផ្តល់ការឧបត្ថម្ភប្រាក់កាសដល់ប្រពន្ធកូនទេ ពិសេសគេទៅណាមកណាក៏មិនផ្តល់ដំណឹងឲ្យដឹងដែរ ជួនកាលបាត់ពីផ្ទះកន្លះខែ ឬមួយខែក៏មានដែរ ហើយថែមទាំងនិយាយភូតកុហកពីលិចទៅកើត ពីកើតទៅលិច ប៉ុន្តែ សុមារី កូនស្រីខ្ញុំ នាងចេះតែទ្រាំ ព្រោះរស់នៅជាមួយគ្នា រហូតមានកូន ២ នាក់ទៅហើយ បើទោះបីជានាងមានឈ្មោះថា ជាប្រពន្ធទីពីរក៏ដោយ ។
គួរបញ្ជាក់ជូនថា អ្នកនាងអោកសុមារី ជាកូនទី៣ ក្នុងចំណោមបងប្អូន ៤ នាក់ ។ នាងរស់ក្នុងបន្ទុករបស់អ្នកស្រី ទី សោភ័ណ្ឌ ជាម្តាយដែលជាស្ត្រីមេម៉ាយ មានស្រុកកំណើតនៅភូមិព្រែក-មហាទេព ឃុំព្រះស្តេច ខេត្តបាត់ដំបង ។ អ្នកនាង អោក សុមារី បានសាងកេរ្តិ៍ឈ្មោះឲ្យល្បីក្នុងពិភពសិល្បៈ ក្នុងខណៈដែលនាងចូលច្រៀងឲ្យផលិតកម្មព្រះវិហារ ហើយបទចម្រៀងដែលល្បីជាងគេនោះគឺបទ “សាន់ឆាយដែលអូនចង់បាន” ។ អ្នកនាងបានសាងជីវិតគ្រួសារ ក្នុងនាមជាភរិយាទីពីររបស់លោក សូត្រ មុនី តាំងពីឆ្នាំ២០០៥ មកម្ល៉េះ ពេលនេះនាងមានវ័យ ២៣ ឆ្នាំហើយ ចំណែកលោកសូត្រ មុនី មានអាយុ៤១ ឆ្នាំ។ ជីវភាពជាគូស្វាមីភរិយាអស់រយៈពេល ៦ ឆ្នាំកន្លងមកនេះ បានបន្សល់ទុកមរតកកូនប្រុសមួយឈ្មោះ ព្រេន នេន អាយុ៤ឆ្នាំ និងកូនស្រីពៅ មានវ័យមួយខួបពីរខែប៉ុណ្ណោះ ៕
Filed Under:
ដំណឹងថ្មីប្រចាំថ្ងៃ
,
សិល្បៈកំសាន្ត